Bismillaah-Hir-Rahamaanir-Raheem

Janaab Stifanus Kī Shahaadat

Iṅjeel : Shaagirdoṅ Ke Āmaal 6:7-15, 7:1-60

Janaab Stifanus Kī Pesh

6:7-15

Allaah taa’alā kā paiġaam chaaroṅ taraf phailtā rahā. Yerushalam me īmaan laane waaloṅ kī taadaad baḍhtī hī rahī. Bahut saare Yahudī imaam bhī īmaan lā rahe the aur kalaam par amal karne lage the.⁽⁷⁾ Un īmaan laane waale logoṅ me se ek kā naam janaab Stifanus thā, jinko Allaah taa’alā ne bahut barkat atā karī thī. Allaah taa’alā ne unko [Yerushalam ke] logoṅ ke beech karishme dikhaane kī taaqat dī thī.⁽⁸⁾ Kucẖ Yahudī log unke ḳḥilaaf khaḍe ho gae. Unmeṅ se kucẖ Yahudī dusre mulkoṅ se bhī the aur wo sab mil kar janaab Stifanus se bahas karne lage.⁽⁹⁾ Lekin ruhul-qudus unkī madad kar rahī thī taaki wo logoṅ ko aqlmaṅdī se jawaab de sakeṅ. Wo log unse bahas me jeet naheeṅ paate the.⁽¹⁰⁾

To unhone kucẖ logoṅ ko rishwat dī aur unse jhuṯ bulwaayā, “Ham ne janaab Stifanus ko Allaah taa’alā aur Musā^(a.s) ke ḳḥilaaf kufr bakte sunā hai!”⁽¹¹⁾ Is baat ko sun kar, Yahudī buzurgoṅ aur maulwiyoṅ ko bahut ġussā āyā. Wo sab janaab Stifanus ko pakaḍ kar Yahudī rahanumaaoṅ ke saamne le gae.⁽¹²⁾ Wo kucẖ logoṅ ko laae taaki wo janaab Stifanus ke ḳḥilaaf jhuṯ bol sakeṅ. Unhone kahā, “Ye ādmī! Hameshā is paak jagah aur Musā^(a.s) ke qaanun ke baare me ulṯī-seedhī baateṅ kartā rahtā hai.⁽¹³⁾ Hamne isko kahte sunā hai ki Naazreth ke rahne waale Īsā^(a.s),is paak jagah ko tabaah kar deṅge. Isne ye bhī kahā hai ki Īsā^(a.s) wo taur-tareeqā bhī badal deṅge jo Musā^(a.s) ne hameṅ sikhaayā hai.”⁽¹⁴⁾ Us jagah par sab log janaab Stifanus ko bahut ġaur se dekh rahe the. Unkā chehrā ek farishte kī tarah chamak rahā thā.⁽¹⁵⁾

Janaab Stifanus Kī Shahaadat

7:1-60

Sabse baḍe imaam ne janaab Stifanus se pucẖā, “Kyā ye baateṅ sach haiṅ?”⁽¹⁾

Janaab Stifanus ne jawaab diyā, “Mere bhaaiyoṅ aur buzurgoṅ, merī baat ko sunie. Allaah rabbul izzat, Ibraaheem^(a.s) par zaahir huā jo hamaare buzurg haiṅ. Ibraaheem^(a.s) us waqt Bilaad Ar-Raafidayan kī jagah par rah rahe the. Isse pahale wo Haaraan naam kī jagah par the.⁽²⁾ Allaah taa’alā ne Ibraaheem^(a.s) se kahā, ‘Apne rishtedaaroṅ aur apnā mulk cẖoḍ kar us jagah par jaao jo maiṅ tumko dikhaauṅgā.’⁽³⁾ To Ibraaheem^(a.s) Kalḏā naam ke mulk ko cẖoḍ kar Haaraan me rahne lage. Jab Ibraaheem^(a.s) ke waalid kā iṅtiqaal ho gayā to Allaah taa’alā ne unheṅ is jagah par rahne ke liye bhejā.⁽⁴⁾ Allaah taa’alā ne Ibraaheem^(a.s) ko us zameen kā thoḍā sā bhī hissā naheeṅ diyā thā. Lekin Ibraaheem^(a.s) kī aulaad hone se pahale Allaah taa’alā ne un se waadā kiyā ki wo ye zameen unkī āne waalī nasloṅ ko degā.⁽⁵⁾ Allaah taa’alā ne unse ye bhī kahā; ‘Tumhaarī nasleṅ ek jagah par ajnabī kī tarah raheṅgī. Us mulk ke log unheṅ apnā ġulaam banā leṅge aur wo unke saath chaar sau saal tak bahut burā suluk kareṅge.⁽⁶⁾ Lekin āḳḥir maiṅ us mulk par azaab bhejuṅgā tabhī tumhaarī qaum wahaaṅ se āzaad ho paaegī. Wo is jagah par merī ibaadat kareṅge.’⁽⁷⁾

“Allaah taa’alā ne Ibraaheem^(a.s) se ek ahad kiyā thā; aur us ahad kī nishaanī mardoṅ kī ḳḥatnā thī. To jab Ibraaheem^(a.s) ke beṯe Ishaaq^(a.s) paidā hue to āṯh dinoṅ ke baad unhone uskī ḳḥatnā kī. Ye silsilā jaarī rahā jab Ishaaq^(a.s) ke beṯe Yaaqub^(a.s) paidā hue aur Yaaqub^(a.s) ke baarah beṯe, jo hamaare baap-daadā haiṅ.⁽⁸⁾

“Ye beṯe apne bhaaī Yusuf^(a.s) se hasad karne lage, jo unkā sabse cẖoṯā bhaaī thā. Unhone usko Misr me ġulaamī karne ke liye bech diyā, lekin Allaah rabbul kareem kī un par nazar-e-karam thī.⁽⁹⁾ Yusuf^(a.s) ko wahaaṅ par bahut pareshaaniyoṅ kā saamnā karnā paḍā, lekin Allaah taa’alā ne unko unse bachā liyā. Misr kā baadshaah, Firaun, unkī bahut izzat kartā thā kyuṅki Allaah taa’alā ne unko aqlmaṅdī atā karī thī. Baadshaah ne unko pure Misr kā gawarnar banā diyā aur apne pure ghar kī zimmedaarī dī.⁽¹⁰⁾

“Tab Misr aur Kannaan me sukhā paḍā aur zameen itnī sukh gaī ki us par kucẖ bhī ugaayā naheeṅ jā saktā thā. Log bahut mushkil me paḍ gae, hamaare baap-daadā ke paas khaane ke liye kucẖ bhī naheeṅ bachā thā.⁽¹¹⁾ Lekin jab Yaaqub^(a.s) ko patā chalā ki Misr me gehuṅ hai to unhone apne beṯoṅ ko wahaaṅ gehuṅ lene pahalī baar bhejā.⁽¹²⁾ Baad me wo wahaaṅ dobaarā gae aur is baar, Yusuf^(a.s) ne apne bhaaiyoṅ ko batā diyā ki wo kaun hai. Baadshaah ko bhī unke ghar waaloṅ ke baare me patā chal gayā.⁽¹³⁾ Yusuf^(a.s) ne kucẖ logoṅ ko bhej kar apne waalid, Yaaqub^(a.s) aur apne rishtedaaroṅ ko Misr me bulwaayā. (Sab log milā kar pachattar the).⁽¹⁴⁾ To Yaaqub^(a.s) Misr gae jahaaṅ par unke ḳḥaandaan waaloṅ ne ziṅdagī guzaarī thī.⁽¹⁵⁾ Unke iṅtiqaal ke baad unko Shakem naam kī jagah par dafnaayā gayā. Ye wahī qabristaan thā jo Ibraaheem^(a.s) ne Hamor ke beṯe se kucẖ paisoṅ me ḳḥareedā thā. (Aur yaheeṅ Ibraaheem^(a.s) bhī dafan the).⁽¹⁶⁾

“Yaaqub^(a.s) ke ghar waale Misr me ḳḥub phale-phule. Wahaaṅ par hamaare logoṅ kī taadaad bahut baḍh gaī thī. Wo waadā jo Allaah taa’alā ne Ibraaheem^(a.s) se kiyā thā wo abhī purā honā thā.⁽¹⁷⁾ Tab Misr kī gaddī par ek nayā baadshaah hukumat ke liye baiṯhā jo Yusuf^(a.s) ko naheeṅ jaantā thā.⁽¹⁸⁾ Is baadshaah ne hamaare logoṅ ke saath dhokhebaazī karī aur hamaare baap-daadā par bahut zulm kare. Usne hamaare bacchoṅ ko qatl kar diyā.⁽¹⁹⁾ Ye wo waqt thā ki jab Musā^(a.s) kī paidaaish huī. Wo bahut hī accẖe the.⁽²⁰⁾ Teen maheene tak unkī dekhbhaal unke waalid ke ghar me hī huī. Lekin jab unko baahar cẖoḍ diyā gayā to baadshaah kī beṯī ne unko uṯhā liyā. Usne unheṅ apne beṯe kī tarah paalā-posā.⁽²¹⁾ Misriyoṅ ne Musā^(a.s) ko taaleem dī. Wo apne kalaam aur kaam donoṅ me hī bahut behatreen the.⁽²²⁾

“Jab Musā^(a.s) chaalees saal ke hue, to unhone apne bhaaiyoṅ se milne kā faislā kiyā. Ye bhaaī Yaaqub^(a.s) kī aulaadeṅ theeṅ.⁽²³⁾ Musā^(a.s) ne dekhā ki ek Misrī ādmī ek Yahudī ādmī ko pareshaan kar rahā hai. Unhone Yahudī ādmī ko bachaayā aur Misrī ādmī ko sazā dī. Musā^(a.s) ne us ādmī ko maarā aur wo mar gayā.⁽²⁴⁾ Unko lagā ki unkā Yahudī bhaaī ye samajh jaaegā ki Allaah taa’alā unke zariye Ibraaniyoṅ kī madad kar rahā hai, lekin wo log ye baat naheeṅ samjhe.⁽²⁵⁾ Agle din, Musā^(a.s) ne dekhā ki do Ibraanī bhaaī āpas me laḍ rahe haiṅ. Unhone un donoṅ ke beech samjhautā karne kī koshish karī. Unhone kahā, ‘Logoṅ, tum āpas me bhaaī ho phir bhī ek dusre ko choṯ kyuṅ pahuṅchā rahe ho?’⁽²⁶⁾ Unmeṅ se jo ādmī badatameezī kar rahā thā us ne Musā^(a.s) ko ek taraf dhakel diyā aur kahne lagā, ‘Tumko hamaarā ḳḥaleefā kisne banaayā?⁽²⁷⁾ Kyā tum mujhe bhī us tarah se qatl kar doge ki jis tarah se kal tumne us Misrī ādmī ko qatl kar diyā thā?’⁽²⁸⁾ Jab Musā^(a.s) ne use ye kahte sunā to wo Misr cẖoḍ kar Midiyaan me rahne chale gae jahaaṅ par wo ek ajnabī the. Midiyaan me hī Musā^(a.s) ke do beṯe hue.⁽²⁹⁾

“Chaalees saal guzre aur ek din Musā^(a.s) registaan me Seenā' ke pahaaḍ ke paas pahuṅche. Ek farishtā unke saamne ek kaaṅṯe daar jhaaḍī par āg kī tarah zaahir huā.⁽³⁰⁾ Jab Musā^(a.s) ne ise dekhā, to bahut hairaan hue. Wo uske paas gae taaki wo use qareeb se dekh sakeṅ. Tab Musā^(a.s) ne Allaah taa’alā kī āwaaz ko sunā.⁽³¹⁾ Allaah rabbul ālameen ne unse kahā, ‘Maiṅ tumhaarā rab huṅ jis par tumhaare baap-daadā īmaan rakhte the. Maiṅ wo rab huṅ ki jis par, Ibraaheem, Ishaaq, aur Yaaqub īmaan rakhte the.’ Musā^(a.s) kaaṁpne lage aur us taraf dekhne se ghabraane lage.⁽³²⁾ Allaah taa’alā ne unse kahā, ‘Apnī chappaleṅ utaar do kyuṅki tum ek paak jagah par khaḍe ho. Maiṅ apne logoṅ par Misr me huī museebatoṅ ko dekh rahā huṅ.⁽³³⁾ Maine unkī fariyaad ko sunā hai aur maiṅ unko bachaauṅgā. E Musā,maiṅ tumheṅ unkī madad ke liye Misr waapas bhej rahā huṅ.’⁽³⁴⁾

“Musā^(a.s) wahī ādmī the ki jinko hamaare baap-daadā pasaṅd naheeṅ karte the aur unse kahte the, ‘Tumko hamaarā ḳḥaleefā kisne banaayā?’ Lekin Allaah taa’alā ne Musā^(a.s) ko hamaare buzurgoṅ ke liye madadgaar aur ḳḥaleefā donoṅ banā kar bhejā. Musā^(a.s) kī madad us farishte ne karī jisko unhone us jaltī huī jhaaḍī me dekhā thā.⁽³⁵⁾ Musā^(a.s) logoṅ ko Misr se baahar nikaal laae. Unhone Misr me, bahar-e-qulzum me aur chaalees saaloṅ tak registaan me Allaah taa’alā kī nishaaniyaaṅ aur karishme dikhaae.⁽³⁶⁾ Musā^(a.s) wahī iṅsaan the jinhone hamaare buzurgoṅ se kahā thā: ‘Allaah taa’alā tumko mere jaisā ek nabī degā; wo tumhaare logoṅ me se hī hogā.’⁽³⁷⁾

“Musā^(a.s) wahī the jo logoṅ kī bheeḍ ke saath registaan me maujud the. Wo hamaare baap-daadā ke saath the. Farishte ne unse Seenā' pahaaḍ par baat karī. Unheṅ Allaah taa’alā se zindagī dene waale hukm mile aur unhone wo hameṅ bataae.⁽³⁸⁾ Lekin hamaare buzurgoṅ ne un qaanunoṅ ko ṯhukrā diyā kyuṅki wo Musā^(a.s) kā kahnā naheeṅ maannā chaahte the aur chaahte the ki waapas Misr chale jaaeṅ.⁽³⁹⁾ Unhone Haarun^(a.s) se kahā ‘Bhaaī Haarun^(a.s), hamko Musā^(a.s) Misr se nikaal laayā hai aur ab patā naheeṅ ki uske saath kyā huā. Islie hamaare liye ek ḳḥudā banaao jo hameṅ raastā dikhā sake.’⁽⁴⁰⁾ To un logoṅ ne gaay kī shakl kā ek but banaayā usko qurbaanī pesh karī aur us par bahut faḳḥr kiyā.⁽⁴¹⁾ Allaah taa’alā unkī is harkat se naaraaz ho gayā aur unko bhaṯakne ke liye cẖoḍ diyā. Un logoṅ ne suraj, chaaṅd, aur taaroṅ kī ibaadat karnā shuru kar dī.

“Taurait shareef me ye likhā huā hai: Allaah rabbul kareem ne kahā, ‘E Yaaqub kī qaum ke logoṅ, registaan me chaalees saal ke safar me wo qurbaaniyaaṅ tumne mujhe pesh naheeṅ kareeṅ!⁽⁴²⁾ Tum apne saath ek taabut uṯhaae phire jismeṅ tum Molek naam ke ek jhuṯe ḳḥudā kā but rakhte the aur uskī ibaadat karte the, iskī sazā ye hai ki maiṅ tumko Baabul se aur dur bhaṯkā duṅgā.’^[a](43)

“Wo paak saṅduq registaan me hamaare buzurgoṅ ke paas thā jismeṅ Allaah taa’alā se milī huī qaanun waalī do sleṯeṅ rakhī theeṅ. Allaah taa’alā ne Musā^(a.s) ko usko banaane kā tareeqā bataayā thā aur unhone use waisā hī banaayā.⁽⁴⁴⁾ Baad me, hamaare buzurg is saṅduk ko le kar janaab Yoshuā^(a.s) ke saath us paak zameen par gae. Allaah taa’alā ne us mulk se logoṅ ko nikaal diyā taaki hamaare buzurg wahaaṅ rah sakeṅ. Ye saṅduk hamaare buzurgoṅ ko wiraasat me unke baap-daadā se milā thā jisko unhone Daaud^(a.s) ke daur tak apne paas rakhā.⁽⁴⁵⁾ Allaah taa’alā Daaud^(a.s) se bahut ḳḥush thā, unhone Allaah taa’alā, Yaaqub^(a.s) ke rab se izhaar kiyā ki wo uske liye ek ghar banaanā chaahte haiṅ.⁽⁴⁶⁾ Lekin Daaud^(a.s) ke beṯe Sulemaan^(a.s) ne ibaadatgaah ko banwaayā.⁽⁴⁷⁾

“Lekin Allaah taa’alā iṅsaan ke haathoṅ se banī ibaadatgaah me naheeṅ rahtā hai. Paiġambar Yashaayaah^(a.s) ne ye kahā thā: ‘Allaah rabbul kareem kahtā hai:⁽⁴⁸⁾ Āsmaan merā taḳḥt hai, zameen mere taḳḥt ke paae. Tumko lagtā hai ki tum mere liye ek ghar banā sakte ho? Allaah rabbul kareem ne kahā: Aisā koī waqt naheeṅ hai ki jab mujhe āraam karne kī zarurat ho.⁽⁴⁹⁾ Yaad rakhnā ki in sab cheezoṅ kā banaane waalā maiṅ hī huṅ!’”^[b](50)

[Janaab Stifanus ne phir kahā,] “Tum ziddī log! Kyā Allaah taa’alā ko tum apne pure dil se naheeṅ chaahte ho! Phir tum uskī baat ko kyuṅ naheeṅ sunte ho! Tum hameshā se us baat ke ḳḥilaaf ho jiskī Allaah taa’alā tumko hidaayat detā hai. Tumhaare buzurg bhī bilkul aise hī the aur tum log bilkul unheeṅ kī tarah ho!⁽⁵¹⁾ Kyā koī aisā nabī hai ki jiskā qatl tumhaare baap-daadā ne n kiyā ho?^[c] Unhone un nabiyoṅ ko bhī qatl kar diyā jinhone ek īmaan waale ke āne kī peshangoī karī thī, aur ab tumne unko bhī dhokā de kar qatl kar diyā.⁽⁵²⁾

“Tumko Musā^(a.s) ke qaanun mile, jo Allaah taa’alā ke ek farishte ne unheṅ die the, lekin tum un par amal naheeṅ karte ho!”⁽⁵³⁾ Jab rahanumaaoṅ ne janaab Stifanus ko ye sab kahte sunā to wo sab ġusse se baukhlā uṯhe aur apne daaṅt peesne lage,⁽⁵⁴⁾ lekin janaab Stifanus Allaah taa’alā ke nur se roshan the. Unhone āsmaan me upar dekhā to jannat ke darwaaze khul gae. Wahaaṅ unheṅ Īsā^(a.s) Allaah taa’alā kī atā kī huī qudrat ke saath khaḍe dikhe!⁽⁵⁵⁾ Janaab Stifanus ne logoṅ se kahā, “Dekho! Maiṅ dekh rahā huṅ ki jannat me iṅsaan kā beṯā Allaah taa’alā kī baadshaahat me ek ālā muqaam par khaḍā hai.”⁽⁵⁶⁾

Ye sun kar wahaaṅ maujud sabhī log zor-zor se cheeḳḥne-chillaane lage. Un sabhī logoṅ ne apne kaanoṅ ko apne haathoṅ se baṅd kar liyā aur janaab Stifanus kī taraf lapke.⁽⁵⁷⁾ Wo log unko shahar se baahar kī taraf ghaseeṯte hue le gae aur patthar maar-maar kar unkī jaan le lī. Jin logoṅ ne janaab Stifanus ke ḳḥilaaf [paise le kar] jhuṯī gawaahī dī thī wo apne koṯ utaar kar Shaaul^[d]naam ke ek naujawaan ke pairoṅ me cẖoḍ kar chale gae.⁽⁵⁸⁾ Jab log unkī taraf patthar pheṅk rahe the to unhone duā karī, “Īsā^(a.s) mere Maseehā, merī ruh ko qubul kareṅ!”⁽⁵⁹⁾ Wo apne ghuṯnoṅ par zameen par gire aur ek tez āwaaz me cheeḳḥ kar bole, “Yā Allaah rabbul azeem, in logoṅ ke is gunaah ko maaf kar de!” Aur ye sab kahne ke baad janaab Stifanus kī ruh parwaaz kar gaī.⁽⁶⁰⁾

[a] Taurait : Āmus 5:25-27

[b] Taurait : Yashaayaah 66:1-2

[c] Quraan Majeed : Annisā 4:155

[d] Fareesiyoṅ kā ek naujawaan leeḏar jo janaab Stifanus ke qatl ke faisle me shareeq thā.