Bismillaah-Hir-Rahamaanir-Raheem

Sacchī Ḳḥushī

Zabur 1

Wo log ḳḥush haiṅ

jo gunaahgaar logoṅ kī salaah ko ṯhukrā dete haiṅ,

jo gunaahgaaroṅ kī raah par naheeṅ chalte,

yā un logoṅ ko naheeṅ apnaate jo Allaah taa’alā ko naheeṅ maante.⁽¹⁾

Balki wo log Allaah taa’alā ke qaanun par amal karne me ḳḥushī mahasus karte haiṅ.

Aur din raat usī kā zikr karte haiṅ.⁽²⁾

Wo us peḍ kī tarah haiṅ jo ek nadī ke kinaare ugā huā ho,

jo bilkul sahī waqt par phal detā hai,

aur jiskī pattiyaaṅ sukhtī naheeṅ.

Wo log jo bhī kaam karte haiṅ usmeṅ unheṅ kaamyaabī haasil hotī hai.⁽³⁾

Lekin gunaahgaar log aise bilkul naheeṅ hote;

wo un sukhe tinkoṅ kī tarah hote haiṅ ki jinko hawā uḍā le jaatī hai.⁽⁴⁾

Allaah taa’alā gunaahgaaroṅ ko sazā degā,

aur unko apne nek bandoṅ se alag rakhegā.⁽⁵⁾

Nek logoṅ ko hī Allaah taa’alā kī hidaayat milegī aur wo mahafuz raheṅge,

lekin gunaahgaar log tabaahī ke raaste par āge baḍh rahe haiṅ.⁽⁶⁾