Bismillaah-Hir-Rahamaanir-Raheem

Allaah Taa’alā Ne Apnā Waadā Purā Kiyā

Iṅjeel : Shaagirdoṅ Ke Āmaal 3:1-16

Ek din janaab Patras aur janaab Yuhannā Yerushalam kī ibaadatgaah me jā rahe the. Wo dopahar teen baje kī ibaadat kā waqt thā.⁽¹⁾ Wahaaṅ, ibaadatgaah ke darwaaze par jisko ḳḥubsurat darwaazā bhī kahte the, ek paidaaishī laṅgḍā baiṯhā rahtā thā. Har din usko us darwaaze par uṯhā kar laayā jaatā thā taaki wo wahaaṅ baiṯh kar bheek maaṅg sake. Wo ibaadat gaah ke aṅdar jaane waale logoṅ se bheek maaṅgtā thā.⁽²⁾ Us ādmī ne jab janaab Patras aur janaab Yuhannā ko aṅdar jaate dekhā to usne paisoṅ kī fariyaad karī.⁽³⁾ Janaab Patras aur janaab Yuhannā ne uskī taraf dekh kar kahā, “Hamaarī taraf dekho!”⁽⁴⁾ Us ādmī ne unkī taraf dekhā; usko lagā ki wo use kucẖ dene waale haiṅ.⁽⁵⁾ Lekin, janaab Patras ne kahā, “Mere paas sonā-chaaṅdī naheeṅ hai, lekin mere paas kucẖ aur hai jo maiṅ tumheṅ de saktā huṅ: Naazreth kā Īsā^(a.s) kī taaqat se uṯh khaḍe ho aur chalo!”⁽⁶⁾

Tab janaab Patras ne us ādmī kā seedhā haath pakaḍ kar upar uṯhaayā aur usī waqt us ādmī ke pair aur ghuṯne mazbut ho gae.⁽⁷⁾

Wo ucẖal kar apne pairoṅ par khaḍā ho gayā aur chalne lagā. Wo ucẖalne-kudne lagā aur Allaah taa’alā kī hamd-o-sanā kartā huā unke saath ibaadatgaah me chalā gayā.⁽⁸⁾ Saare logoṅ ne use Allaah taa’alā kī taareef karte hue sunā.⁽⁹⁾ Un sab logoṅ ne use pahachaan liyā ki ye wahī paidaaishī laṅgḍā hai jo ḳḥubsurat darwaaze par roz bheek maaṅgtā thā. Log ye dekh kar bahut hairaan the aur samajh naheeṅ pā rahe the ki ye sab kaise ho gayā.⁽¹⁰⁾

Woādmī janaab Patras aur janaab Yuhannā ko pakḍe hue thā. Saare log dauḍ kar ibaadatgaah ke āṅgan me us jagah jamā ho gae. Ibaadatgaah ke us āṅgan ko Sulemaan^(a.s) kā āṅgan bhī kahte the. Sabhī log hairat se bhare hue the.⁽¹¹⁾ Jab janaab Patras ne ye dekhā, to unhone logoṅ se kahā, “Ibraanī logoṅ, tum itnā hairaan kyuṅ ho? Tum log hameṅ ghur kyuṅ rahe ho? Kyā hamne is ādmī ko apnī taaqat se yā apne nek amal se chalne-phirne ke laayak banaayā hai. Naheeṅ!⁽¹²⁾ Ye Allaah rabbul kareem ne ye kiyā hai, jis par Ibraaheem^(a.s), Ishaaq^(a.s) aur Yaaqub^(a.s) īmaan rakhte the. Us rab ne kī jiskī ibaadat buzurg bhī karte the, usī ne apne ġulaam Īsā^(a.s) ko izzat baḳḥshī hai. Wo wahī the jinko tum logoṅ ne Romī gawarnar, Peelaatus, ke hawaale kar diyā thā.⁽¹³⁾ Jab Peelaatus ne unko āzaad karne kā faislā karā to tumne manā kar diyā. Unke badle me tumne ek gunaahgaar, baraabbas, ko āzaad karwaayā.⁽¹⁴⁾ Tab tumne Peelaatus se kahā ki unko qatl kar do jo ziṅdagī atā karne waalā hai! Lekin Allaah taa’alā ne unheṅ ziṅdā kar diyā. Ham sab is baat ke gawaah haiṅ.⁽¹⁵⁾ Is ādmī ko jise tum jaante ho, Īsā^(a.s) ke naam par yaqeen hone kī wajah se shifā milī hai. Ye ādmī purī tarah se islie ṯheek ho gayā kyuṅki ye Īsā^(a.s) par īmaan laayā hai.”⁽¹⁶⁾