Bismillaah-Hir-Rahamaanir-Raheem

Yaahyā^(a.s) Kī Paidaaish

Iṅjeel : Luqaas 1:57-80

Beebī Elishibā ne ek laḍke ko paidā kiyā.⁽⁵⁷⁾ Jab unke paḍosiyoṅ aur rishtedaaroṅ ko patā chalā ki Allaah taa’alā ne apnī rahamat un par naazil karī hai to wo sab bahut ḳḥush hue.⁽⁵⁸⁾ Jab bacchā āṯh din kā huā, to wo sab log uskī ḳḥatnā kī rasm me shareeq hue. Un sabne us bacche kā naam Zakriyā rakhnā chaahā kyuṅki unke waalid kā bhī yahī naam thā.⁽⁵⁹⁾ Lekin us bacche kī maaṅ ne kahā, “Naheeṅ! Is bacche kā naam Yaahyā hogā.”⁽⁶⁰⁾

Logoṅ ne beebī Elishibā se kahā, “Tumhaare ḳḥaandaan me ye naam to kisī kā bhī naheeṅ hai!”⁽⁶¹⁾ Tab un logoṅ ne apne haathoṅ ke ishaare se us bacche ke waalid se pucẖā ki wo apne bacche kā kyā naam rakhnā chaahte haiṅ.⁽⁶²⁾ Zakriyā^(a.s) ne ishaare se kaaġaz par kucẖ likhne ke liye kahā, “Iskā naam Yaahyā hai.” Har koī hairaan rah gayā.⁽⁶³⁾ Tabhī achaanak se Zakriyā^(a.s) kī āwaaz waapas ā gaī aur wo Allaah rabbul azeem kī hamd-o-sanā karne lage.⁽⁶⁴⁾ Ye sab dekh kar saare log ghabrā gae aur ye baat mulk Yahudiyā ke chaaroṅ taraf phail gaī.⁽⁶⁵⁾ Log isko sun kar hairaan hote the aur sochte the, “Ye bacchā baḍe ho kar kyā banegā?” Wo sab aisā islie kahte the kyuṅki Allaah taa’alā kī taaqat uske saath thī.⁽⁶⁶⁾

Yaahyā^(a.s) ke waalid, Zakriyā^(a.s), Allaah taa’alā ke nur se roshan ho gae. Unhone logoṅ ko bataayā ki kyā hone waalā hai:^[a](67)

 

“Chalo ham uskā shukr adā karte haiṅ, jis par ham Ibraanī log īmaan rakhte haiṅ. Allaah taa’alā apne logoṅ ko āzaad karaane ke liye madad bhej rahā hai.⁽⁶⁸⁾

“Allaah taa’alā ne Daaud^(a.s) ke gharaane me ek taaqatwar Maseehā bhejā hai.⁽⁶⁹⁾

“Allaah taa’alā ne isko karne kā waadā karā thā.

“Usne hī ye sab ek zamaanā pahale apne nabiyoṅ ko bataayā thā.⁽⁷⁰⁾

“Allaah taa’alā ne kahā thā ki wo hameṅ dushmanoṅ se bachaaegā,

“Aur un logoṅ kī taaqat se bhī jo hamse nafrat karte haiṅ.⁽⁷¹⁾

“Allaah taa’alā ne kahā thā ki wo hamaare baap-daadā par raham karegā.

“Aur wo apne paak ahad ko hameshā yaad rakhegā.⁽⁷²⁾

“Allaah taa’alā ne hamaare buzurg Ibraaheem^(a.s) se ek ahad kiyā thā.⁽⁷³⁾

“Usne waadā kiyā thā ki wo hameṅ dushmanoṅ kī taaqat se bachaaegā,

“Taaki ham log binā kisī ḏar ke Allaah rabbul azeem kī ibaadat kar sakeṅ.⁽⁷⁴⁾

“Ham purī umr Allaah taa’alā ke saamne nek aur paak ho jaaeṅge.⁽⁷⁵⁾

“Ab tum, e bacche, Allaah rabbul azeem ke nabī kahe jaaoge.

“Kyuṅki, tum Maseehā se pahale uskā raastā banaane jaaoge.⁽⁷⁶⁾

“Tum uske logoṅ ko nijaat kā raastā dikhaaoge,

“Taaki wo log apne gunaahoṅ ko maaf karwā sakeṅ aur bach jaaeṅ.⁽⁷⁷⁾

“Us par jo Allaah taa’alā kī rahamat hai jiskī wajah se,

“Ham logoṅ par jannat kā ek nayā sawerā hogā.⁽⁷⁸⁾

“Jo log aṅdhere me haiṅ un par Allaah taa’alā kī taraf se ek roshnī pahuṅchegī,

“Un logoṅ par bhī jo log maut kī parcẖaaiyoṅ se ghire hue haiṅ.

“Wo roshnī unke pairoṅ ko rahamat kī raah par chalne kā raastā dikhaaegī.”⁽⁷⁹⁾

Yaahyā^(a.s) baḍe ho kar bahut ruhaanī ho gae aur jaṅgaloṅ me hī rahā karte the taaki sahī waqt āne par wo Ibraaniyoṅ ko hidaayat de sakeṅ.⁽⁸⁰⁾

[a] Allaah taa’alā ke nur ne unko ilm de diyā thā ki wo hone waalī baatoṅ ko pahale se jaan lete the jaise ki unkī beewī Elishibā ko thā.