Bismillaah-Hir-Rahamaanir-Raheem

Romī Afsar Kā Aqeedā

Iṅjeel : Luqaas 7:1-30

Logoṅ ko taaleem dene ke baad, Īsā^(a.s) Kafarnahum ke ek qasbe me gae.⁽¹⁾ Wahaaṅ par ek bahut baḍā Romī faujī afsar rahtā thā. Us faujī afsar kā ek naukar bahut beemaar thā aur apnī āḳḥirī saaṅseṅ gin rahā thā. Wo afsar apne naukar ko bahut pasaṅd kartā thā.⁽²⁾ Jab usko Īsā^(a.s) ke baare me patā chalā, to usne kucẖ izzatdaar Yahudī rahanumaaoṅ ko unke paas bhejā. Wo chaahtā thā ki wo log Īsā^(a.s) se kaheṅ ki wo is marte hue ādmī ko bachā leṅ.⁽³⁾

Wo log Īsā^(a.s) ke paas pahuṅche aur unse afsar kī madad kī bheek maaṅgī. Un logoṅ ne kahā, “Wo afsar is laayaq hai ki āp iskī madad kareṅ.⁽⁴⁾ Wo qaum ke logoṅ se bahut accẖā bartaaw kartā hai aur usne hamaare liye ek ibaadat gaah bhī banwaaī hai.” Īsā^(a.s) unke saath jaane ke liye taiyaar ho gae.⁽⁵⁾ Jab Īsā^(a.s) us afsar ke ghar ke qareeb pahuṅche to us afsar ne apne dostoṅ ko bhej kar kahalawaayā, “Maalik mere liye kucẖ ḳḥaas karne kī zarurat naheeṅ hai. Maiṅ itnā nek naheeṅ huṅ ki āp mere ghar ke aṅdar āeṅ.⁽⁶⁾ Maiṅ iske laayaq naheeṅ huṅ, islie āpkī ḳḥidmat me bhī haazir naheeṅ ho paayā. Āpko bas waheeṅ se hukm dene kī zarurat hai aur merā naukar waheeṅ se hī ṯheek ho jaaegā.⁽⁷⁾ Maiṅ ye islie jaantā huṅ ki maiṅ bhī kisī ke hukm par amal kartā huṅ aur merī sardaarī me jo faujī haiṅ to maiṅ unko hukm detā huṅ aur wo us par amal karte haiṅ. Maiṅ agar kisī faujī se kahuṅ, ‘Yahaaṅ āo,’ to wo ā jaatā hai aur agar kahuṅ, ‘Wahaaṅ jaao,’ to chalā jaatā hai. Agar maiṅ apne kisī naukar se kisī kaam ko karne kā hukm detā huṅ, ‘Ye karo,’ to merā naukar merā kahnā maantā hai.”⁽⁸⁾ Jab Īsā^(a.s) ne uskī is baat ko sunā to wo hairaan rah gae aur saath maujud logoṅ se kahā, “Iske jaisā īmaan maine kaheeṅ naheeṅ dekhā, Israaeel me bhī naheeṅ.”⁽⁹⁾ Jo dost Īsā^(a.s) ke paas āe the, wo ghar waapas chale gae aur wahaaṅ jā kar dekhā ki wo naukar ṯheek ho gayā thā.⁽¹⁰⁾

Maut Par Qudrat

Agle din Īsā^(a.s) aur unke shaagird Naeen naam ke ek shahar pahuṅche. Unke saath bahut saare log safar kar rahe the.⁽¹¹⁾ Jab Īsā^(a.s) us qasbe ke paas pahuṅche to unhone dekhā ki log ek laḍke kī laash ko qabristaan le jā rahe haiṅ aur qasbe ke bahut se log miṯṯī me shareek haiṅ. Wo ek bewā maaṅ kā iklautā beṯā thā.⁽¹²⁾ Jab Īsā^(a.s) ne us aurat ko dekhā to unheṅ bahut afsos huā, aur unhone us aurat se kahā, “Ro naheeṅ.”⁽¹³⁾ Jab wo us laḍke kī laash ke qareeb pahuṅche to wo sab log waheeṅ ruk gae. Īsā^(a.s) ne us mare hue beṯe ko pukaar kar kahā: “‘E naujawaan, maiṅ tumse kahtā huṅ, uṯh khaḍe ho!”⁽¹⁴⁾ Tab wo laḍkā uṯh kar baiṯh gayā aur baateṅ karne lagā. Īsā^(a.s) ne us bacche ko uskī maaṅ ko de diyā.⁽¹⁵⁾ Wahaaṅ maujud sab log ḏar kar saham gae. Wo sabhī Allaah taa’alā kī taareef karne lage aur bol paḍe, “Ek azeem nabī hamaare saath hai! Aur Allaah rabbul kareem apne bandoṅ kī dekhbhaal kar rahā hai.”⁽¹⁶⁾ Īsā^(a.s) kī is karaamat kī ḳḥabar pure Yahudiyā aur uske ās-paas ke ilaaqe me phail gaī.⁽¹⁷⁾

Yaahyā^(a.s) Kaun Haiṅ?

Yaahyā^(a.s) ke ek shaagird ne unheṅ ā kar iske baare me bataayā. Yaahyā^(a.s) ne apne do shaagirdoṅ ko⁽¹⁸⁾ Īsā^(a.s) se ye pucẖne bhejā: “Kyā āp wahī haiṅ jiske baare me hamne sunā thā ki āne waalā hai, yā ham kisī dusre kā iṅtazaar kareṅ?”⁽¹⁹⁾ To wo shaagird Īsā^(a.s) ke paas āe aur pucẖā, “Kyā āp wahī haiṅ jiske baare me hamne sunā thā ki āne waalā hai, yā ham kisī aur kā iṅtazaar kareṅ?”⁽²⁰⁾

Un dinoṅ Īsā^(a.s) beemaaroṅ aur laachaaroṅ kā ilaaj kar rahe the. Wo logoṅ ko gandī ruhoṅ se nijaat de rahe the aur unhone bahut se aṅdhoṅ ko āṅkhoṅ kī roshnī atā karī thī.⁽²¹⁾ Unhone Yaahyā^(a.s) ke shaagirdoṅ se kahā, “Jaao aur jā kar unheṅ ye sab bataao jo tumne dekhā aur sunā hai, unheṅ bataao: Aṅdhe ab dekh sakte haiṅ. Jinko lakwā maar gayā thā, ab wo chal sakte haiṅ. Koḍhī ṯheek ho gae haiṅ. Bahre sun sakte haiṅ aur murdoṅ ko phir se zindagī mil gaī hai. Ġareeboṅ ko ḳḥushḳḥabarī sunā dī gaī hai.⁽²²⁾ Un logoṅ par barkat naazil hogī ki jo log merī wajah se īmaan se naheeṅ bhaṯkeṅ.”⁽²³⁾

Jab Yaahyā^(a.s) ke shaagird wahaaṅ se chale gae, to Īsā^(a.s) ne logoṅ ko Yaahyā^(a.s) ke baare me bataanā shuru kiyā: “Tum log registaan me kyā dekhne gae the? Ghaas kā ek tinkā jo hawā me uḍ rahā hai?^[a](24) Unhone phir pucẖā, tum log registaan me kyā dekhne gae the? Kyā wahaaṅ koī accẖe kapḍe pahne ghum rahā thā? Naheeṅ, jo log mahaṅge aur accẖe kapḍe pahante haiṅ, wo log mahaloṅ me rahte haiṅ.⁽²⁵⁾

“To tum wahaaṅ kyā dekhne gae the? Ek paiġambar ko? Haaṅ, Yaahyā^(a.s) ek paiġambar haiṅ. Lekin maiṅ tumse kahtā huṅ, wo usse baḍh kar haiṅ.⁽²⁶⁾ Bahut zamaane pahale unke baare me likhā gayā thā: ‘Suno! Maiṅ apne paiġaam dene waale ko tumse pahale bhejuṅgā. Wo tumhaarā raastā taiyaar karegā.’^[b](27) Maiṅ tumheṅ bataatā huṅ, duniyaawī paidaaish ke mutaabiq koī bhī Yaahyā^(a.s) se zyaadā azeem naheeṅ hai. Lekin jo iṅsaan Allaah taa’alā kī baadshaahī me sab se cẖoṯā hai wo Yaahyā^(a.s) kī azeem paidaaish se zyaadā azeem hai.”^[c](28) Jab logoṅ ne Īsā^(a.s) kī is baat ko sunā, un sab ne yahī kahā, “Beshak Allaah taa’alā insaafaparawar hai.” Yahaaṅ tak ki Romī fauj me kaam karne waale logoṅ ko bhī ye baat sahī lagī. Ye wo log the ki jinko Yaahyā^(a.s) ne ġusl diyā thā.⁽²⁹⁾ Lekin Fareesī mazhabī rahanumā aur jo log Musā^(a.s) ke qaanun ke ālim the un logoṅ ne Allaah taa’alā kī is baat se inkaar kar diyā, kyuṅki unhone Yaahyā^(a.s) se ġusl lene se manā kar diyā thā.⁽³⁰⁾

[a] Hawā me laharaatā huā ghaas kā tinkā baadshaah Herodes kī nishaanī thā aur wo uske sikke par phir Khudā huā thā. Īsā^(a.s) ne ye islie kahā kyuṅki wo baadshaah Herodes kī taraf ishaarā kar rahe the.

[b] Taurait : Malaaqī 3:1

[c] Īsā^(a.s) Yaahyā^(a.s) kī beizztī naheeṅ kar rahe the, balki samjhā rahe the ki Allaah taa’alā kī baadshaahī me cẖoṯā honā is jismaanī duniyā me azeem hone se behatar hai. Kyuṅki Īsā^(a.s) ne farmaayā ki Allaah taa’alā kī baadshaahī me daaḳḥil hone ke liye hameṅ do baar paidā honā paḍtā hai: Pahalī baar maaṅ ke peṯ se aur dusrī baar ruhaanī tareeke se. (Iṅjeel : Yuhannā 3:1-8)