Bismillaah-Hir-Rahamaanir-Raheem

Maut Kī Peshangoī

Iṅjeel : Muhaafiz 8:31-38

Īsā^(a.s) apne shaagirdoṅ ko bataanā shuru karte haiṅ ki Ādmī Kā Beṯā bahut mushkileṅ sahegā. Wo unko bataate haiṅ ki Ādmī Ke Beṯe ko Yahudī imaam, ālim, aur buzurg qubul naheeṅ kareṅge aur iske bajaae usko qatl kar deṅge. Wo teen dinoṅ ke baad dubaarā zindā hogā.⁽³¹⁾ Īsā^(a.s) ne unko ye baateṅ saaf batā deeṅ ki kyā hone waalā hai. Tab Īsā^(a.s) kā ek shaagird, jiskā naam Patras thā, wo unko ek taraf le kar gayā aur un par naaraazgī zaahir karne lagā.⁽³²⁾ Īsā^(a.s) ne muḍ kar apne baaqī shaagirdoṅ ko dekhā aur phir Patras ko ḏaaṅṯte hue bole, “Mere peecẖe raho, Shaitaan! Tumko is baat kī samajh naheeṅ hai ki Allaah taa’alā ke liye kyā zarurī hai. Tum us baat kī fikr kar rahe ho jo iṅsaan ke liye zarurī hai.”⁽³³⁾

Tab Īsā^(a.s) ne sab logoṅ ko aur apne shaagirdoṅ ko paas bulaayā. Unhone kahā, “Agar koī merī tarah zindagī guzaarnā chaahtā hai, to use apnī nafs ko maarnā paḍegā. Wo hameshā marne ke liye taiyaar rahe aur unheṅ chaahie ki wo merī hidaayatoṅ par amal kare.⁽³⁴⁾ Jo bhī apnī zindagī ko bachaane kī koshish karegā wo use kho degā. Lekin jo bhī apnī zindagī mere liye aur us accẖī ḳḥabar ke liye qurbaan karegā to wo apnī zindagī bachā legā.⁽³⁵⁾ Agar koī purī duniyā haasil kare aur apnī ruh ko kho de to use kyā faaydā haasil hogā.⁽³⁶⁾ Koī ādmī apnī ruh ke badle me kyā lenā pasaṅd karegā?⁽³⁷⁾ Is daur ke log gunaahgaar haiṅ aur nekī kī raah se bhaṯke hue haiṅ. Agar āj koī mujh se aur merī baatoṅ se sharmiṅdā ho rahā hai, to Ādmī Kā Beṯā jab waapas āegā to usse sharmiṅdā hogā. Wo jab waapas āegā to Allaah taa’alā ke nur aur uske paak farishtoṅ se ghirā huā hogā.”⁽³⁸⁾