Bismillaah-Hir-Rahamaanir-Raheem

Nekī Kā Peḍ

Taurait : Yashaayaah 61

Allaah rabbul azeem ne apnī taaqat mujh me phuṅkī hai.

Allaah taa’alā ne mujhe chunā hai

ki maiṅ pareshaan logoṅ ko accẖī ḳḥabar sunaauṅ.

Usne mujhe ṯuṯe dil waaloṅ ko shifā dene ke liye bhejā hai,

aur un logoṅ ko āzaad karne ke liye ki jo qaid haiṅ,

aur un logoṅ ko jo aṅdhere se ghire hue haiṅ.⁽¹⁾

Mujhe ye ailaan karne bhejā gayā hai

ki Allaah taa’alā kī ḳḥaas meharbaanī kā waqt ā gayā hai,

aur us din ke baare me bataane ke liye ki jab bure logoṅ ko sazā milegī.

Taaki jo log ġam se bhare hue haiṅ unheṅ ye sun kar sukun mil sake.⁽²⁾

Mere watan kī zameen par jo bhī takleef me hogā,

maiṅ unke saroṅ se raaḳḥ haṯā kar taaj pahanaauṅgā.

Unke ġam le kar ḳḥushī atā karuṅgā,

maayusī kī jagah ummeed kī chaadar atā karuṅgā.

Tab wo log nekī kā ek baḍā peḍ kahalaaeṅge,

jisko Allaah rabbul azeem ne apnī azmat ke liye ugaayā ho.⁽³⁾

Wo log kaī pushtoṅ pahale tabaah ho chuke,

shaharoṅ ko phir se ābaad kareṅge.

Wo khaṅḏar ho chuke shaharoṅ ko phir se basā leṅge.⁽⁴⁾

Anjaan log āeṅge aur tumhaarī bheḍoṅ ko charaayā kareṅge.

Dusre mulk ke logoṅ ke bacche tumhaare kisaan hoṅge

aur tumhaare baaġoṅ kī dekhbhaal kareṅge.⁽⁵⁾

Tumko Allaah taa’alā kā imaam kahā jaaegā,

log kaheṅge ki tum hī Allaah taa’alā ke ḳḥidmatgaar bande ho.

Tumhaare paas saarī duniyā ke ḳḥazaane hoṅge.

Tumhaare dushman bhī tumhaarī izzat kareṅge.⁽⁶⁾

Tum ko beizztī ke bajaae tumhaare haq kā do gunā diyā jaaegā.

Tumhaare log badnaamī se bach jaaeṅge aur usī me ḳḥush raheṅge jitnā unke paas hai.

Unko apnī zameenoṅ me dugnā hissā milegā,

aur unkī ḳḥushhaalī hameshā qaayam rahegī.⁽⁷⁾

Kyuṅki Allaah taa’alā kahtā hai, “Maiṅ tumhaarā rab huṅ, jisko iṅsaaf pasaṅd hai.”

Maiṅ luṯ-paaṯ aur har ġalat kaam se nafrat kartā huṅ.

Maiṅ iṅsaaf karuṅgā aur logoṅ ko wahī duṅgā jiske wo haqdaar haiṅ.

Maiṅ unke saath kabhī nā ḳḥatm hone waalā ek ahad karuṅgā.⁽⁸⁾

Aur unkī aulaadeṅ dusre ḳḥaandaanoṅ me mashahur hoṅgī,

aur unse paidā hone waalī nasleṅ sab logoṅ me.

Jo bhī unheṅ dekhegā wo unheṅ pahachaan legā

kyuṅki ye wo log hoṅge ki jinko Allaah taa’alā ne barkat se nawaazā hogā.⁽⁹⁾

Maiṅ apne rab se bahut ḳḥush huṅ!

Merā dil Allaah rabbul azeem kī hamd-o-sanā kartā hai,

kyuṅki usne mujhe nijaat ke kapḍe atā kie haiṅ,

aur mujhe nekī ke libaas me lapeṯ diyā hai.

Maiṅ is tarah se sajā huṅ ki jis tarah ek dulhā apnī shaadī ke liye taiyaar huā ho;

maiṅ ek dulhan kī tarah zewroṅ se sajā huā huṅ.⁽¹⁰⁾

Jis tarah se zameen peḍoṅ ko ugne me madad kartī hai,

aur ek baaġ beejoṅ se kopleṅ phuṯne me;

isī tarah se, Allaah rabbul azeem nekī ko qaayam karegā,

aur apnī taareef duniyā ke har ḳḥaandaan aur qaum ke saamne karawaayegā.⁽¹¹⁾