Bismillaah-Hir-Rahamaanir-Raheem

Hamaarā Paḍosī Kaun Hai?

Iṅjeel : Luqaas 10:25-37

Ek din, qaanun paḍhaane waale ek ustaad ne Īsā^(a.s) ko āzmaane ke liye unse pucẖā, “Maiṅ aisā kyā karuṅ ki mujhe kabhī nā ḳḥatm hone waalī ziṅdagī mile?”⁽²⁵⁾

Īsā^(a.s) ne use jawaab diyā, “Qaanun me kyā likhā hai? Tumne is baare me kyā paḍhā?”⁽²⁶⁾

Us ādmī ne jawaab diyā, “‘Tum apne rab, Allaah taa’alā se mohabbat karo. Tum use apne pure dil, dimaaġ, apnī ruh, aur apnī purī taaqat se pyaar karo.’ Aur, ‘Tum apne paḍosī se utnī hī mohabbat karo jitnī tum apne āp se karte ho.’”⁽²⁷⁾

Īsā^(a.s) ne kahā, “Tumhaarā jawaab bilkul ṯheek hai. Tum agar ye karoge to tumko ziṅdagī milegī.”⁽²⁸⁾ Lekin wo ādmī apnī ziṅdagī guzaarne ke tareeqe ko badalnā naheeṅ chaahtā thā. Islie usne Īsā^(a.s) se kahā, “Aur merā paḍosī kaun hai?”⁽²⁹⁾

Us sawaal kā jawaab dene ke liye, Īsā^(a.s) ne kahā, “Ek [Ibraanī] ādmī Yerushalam se nikal kar Areeḳḥā naam ke ek shahar kī taraf jā rahā hai aur use raaste me kucẖ luṯere luṯ lete haiṅ. Wo usko maarte haiṅ aur uske kapḍe phaaḍ dete haiṅ. Wo luṯere usko zaḳḥmī kar ke wahaaṅ se chale jaate haiṅ.⁽³⁰⁾

“Ittefaaq se ek Ibraanī imaam bhī usī raaste se guzar rahā thā. Jab imaam ne us ādmī ko dekhā to usne fauran apnā raastā badal liyā aur saḍak ke dusrī taraf chalne lagā.⁽³¹⁾ Uske baad [Musā^(a.s) ke qabeele] Laawī qabeele kā ek ādmī bhī wahaaṅ se guzrā. Wo us zaḳḥmī ādmī ko dekhne uske paas tak gayā lekin wo bhī saḍak kī dusrī taraf chalā gayā.⁽³²⁾

“Tab wahaaṅ ek Saamrī ādmī āyā [jisko Ibraanī log neechī nazar se dekhte the]. Wo Saamrī us jagah pahuṅchā jahaaṅ wo zaḳḥmī ādmī paḍā huā thā. Usne jab us ādmī ko dekhā to usko bahut afsos huā.⁽³³⁾ Us Saamrī ādmī ne us zaḳḥmī ādmī ke zaḳḥm ko saaf kar ke paṯṯī baaṅdhī. Usko apne gadhe par biṯhaayā aur ek saraae me le gayā. Wahaaṅ le jā kar uskī dekhbhaal karī.⁽³⁴⁾ Dusre din us Saamrī ādmī ne saraae ke maalik ko do chaaṅdī ke sikke die aur kahā, ‘Is ādmī kā ḳḥyaal rakhnā aur agar iskī dekhbhaal me kucẖ zyaadā ḳḥarch ho jaae to maiṅ aglī baar ā kar de duṅgā.’”⁽³⁵⁾

Īsā^(a.s) ne pucẖā, “Tumheṅ kyā lagtā hai ki in teen logoṅ me se kaun sā ādmī us zaḳḥmī ādmī kā paḍosī hai?”⁽³⁶⁾

Qaanun ke maahir ne jawaab diyā, “Jisne uskī madad karī.” Īsā^(a.s) ne us se kahā, “To tum bhī wahī karo jo us ādmī ne kiyā hai!”⁽³⁷⁾