Bismillaah-Hir-Rahamaanir-Raheem

Ibraaheem^(a.s) Aur Unkī Qaum, Nasloṅ Ko Barkat

Taurait : Ḳḥilqat 12:1-7

Allaah taa’alā ne Ibraaheem^(a.s)[a] se kahā, “Tum apne mulk aur apne logoṅ ko aur apne ḳḥaandaan ko cẖoḍo aur us mulk me jaao jo maiṅ tumheṅ dikhaauṅgā.⁽¹⁾ Maiṅ tumse ek azeem jamaat ko banaauṅgā. Maiṅ tumko barkat duṅgā aur tumhaare naam ko mashahur kar duṅgā. Tumhaarī wajah se zameen ke bahut saare logoṅ ko barkat milegī.⁽²⁾ Maiṅ un logoṅ ko barkat duṅgā jo tumko izzat deṅge aur maiṅ un logoṅ par laanat bhejuṅgā jo tumhaarī beizztī kareṅge. Tum se hī is sarzmeen ke saare ḳḥaandaanoṅ par barkat hogī.”⁽³⁾

Ibraaheem^(a.s) ne Allaah taa’alā ke hukm ke mutaabiq Haaraan shahar ko cẖoḍā.⁽⁴⁾ Lut^(a.s) bhī unke saath gae. Ibraaheem^(a.s) pachahattar saal ke the jab unhone shahar Haaraan ko cẖoḍā thā. Unhone apnī beewī Saarah apne bhateeje aur apnī saarī jamā kī huī cheezoṅ ko liyā aur un saare logoṅ ko bhī saath liyā jo unheṅ Haaraan kī zameen par mile the. Tab wo aur unke ghar waale Haaraan ko cẖoḍ kar Kannaan kī zameen par pahuṅche. Wo log bahut lambā safar tay kar ke shehkam pahuṅche.⁽⁵⁾ Wo āge safar karte hue ek baḍe shaahablut ke peḍ ke paas jā pahuṅche jo Mure naam kī jagah me thā. Kannaan ke log us waqt us zameen par rahte the.⁽⁶⁾ Tab Allaah taa’alā ne Ibraaheem^(a.s) se baat karī aur kahā, “Maiṅ ye zameen tumhaarī nasl ko de rahā huṅ.” To Ibraaheem^(a.s) ne wahaaṅ ek chabutrā banaayā, kyuṅki Allaah taa’alā ne unse us jagah par baat karī thī.⁽⁷⁾

[a] Allaah taa’alā ne Ibraaheem^(a.s) ko barkat dī aur unkā naam Abraam se badal kar Ibraaheem rakh diyā. Abraam kā matlab hai ek izzatdaar waalid aur Ibraaheem kā matlab hai ek azeem qaum kā waalid. Allaah taa’alā ne unkī nasloṅ ko itnā baḍhaane kā waadā kiyā thā ke jitne āsmaan me taare haiṅ yā samaṅdar me jitne ret ke daane.