Bismillaah-Hir-Rahamaanir-Raheem

Ḳḥairaat, Ibaadat, Aur Rozā

Iṅjeel : Mattā 6:1-18

[Īsā^(a.s) ne maujud logoṅ ko ḳḥairaat ke baare me bataayā. Unhone kahā:]

“Jab tum kucẖ accẖā kaam karo to hoshiyaarī se kaam lo, usko dikhaawe ke liye logoṅ ke saamne nā karo. Agar tum aisā karoge to tumheṅ parwardigaar se koī sawaab naheeṅ milegā.⁽¹⁾ Islie, jab tum kisī zaruratmaṅd kī madad karo, to uskā ḏhiṅḏhorā mat peeṯo. Tum un munaafikoṅ kī tarah nā ho jaao jo sirf dusroṅ kī taareef haasil karnā chaahte haiṅ. Wo log agar ibaadatgaah yā saḍak par kisī zaruratmaṅd kī madad karte haiṅ, to ḏhol bajā kar ailaan karwaate haiṅ taaki log us madad ko dekh leṅ. Maiṅ tumko sacchaaī bataatā huṅ, ki un logoṅ ko iskā koī sawaab naheeṅ milegā.⁽²⁾ Tum jab kisī ġareeb kī madad karo to apne ulṯe haath ko ḳḥabar nā lagne do ki seedhā haath kyā kar rahā hai.⁽³⁾ Ḳḥairaat hameshā cẖupā kar do. Jab parwardigaar tumko is tarah se cẖupā kar dete hue dekhegā, to tumko iskā sawaab atā karegā.⁽⁴⁾

[Tab Īsā^(a.s) ne logoṅ ko ibaadat ke baare me bataayā aur unhone kahā:]

“Jab tum ibaadat karo to paakhaṅḏī logoṅ kī tarah mat karo. Wo ibaadatgaah me aur saḍak ke kinaare khaḍe ho kar ibaadat karnā pasaṅd karte haiṅ aur tez āwaaz me duā karte haiṅ. Wo chaahte haiṅ ki log unheṅ dekheṅ. Maiṅ tumko sacchaaī bataatā huṅ ki un logoṅ ko iskā koī aur sawaab naheeṅ milegā.⁽⁵⁾ To jab tum ibaadat karnā chaaho to kisī sukun kī jagah par baṅd darwaaze me us rab kī ibaadat karo. Wo us ḳḥaas jagah par tumhaare saath hogā. Jab tumhaarā rab tumko aisī ḳḥaas jagah par ibaadat kartā dekhegā, to tumko iskā sawaab atā karegā.⁽⁶⁾

“Aur jab tum ibaadat karo, to faaltu baatoṅ ko baar-baar mat dohraao jaise Allaah rabbul kareem ko nā jaanne waale dohraate haiṅ. Unko lagtā hai ki unkī baat islie sun lī jaaegī kyuṅki wo zyaadā lafzoṅ kā istemaal karte haiṅ.⁽⁷⁾ Tum un logoṅ kī tarah bilkul bhī nā karo, kyuṅki Allaah rabbul ālameen tumhaare maaṅgne se pahale jaantā hai ki tumheṅ kyā chaahie.⁽⁸⁾ Tum is tarah se duā maaṅgo:

Ai Allaah rabbul ālameen,

log tere naam kī azmat aur paakeezgī ko pahachaaneṅ.⁽⁹⁾

Terī saltanat zameen par cẖā jaae.

Aur jannat kī tarah zameen par bhī bas terī marzī kā hī kaam ho.⁽¹⁰⁾

Hameṅ wo rizq de jiskī hameṅ zarurat hai,⁽¹¹⁾

aur hamaare gunaahoṅ ko maaf kar de,

usī tarah se jaise ham un logoṅ ko maaf karte haiṅ jo hamaare saath saazish karte haiṅ.⁽¹²⁾

Hamko bahakaawe se dur rakh,

aur hamko Shaitaan se bachā. [Āmeen.]⁽¹³⁾

[Īsā^(a.s) ne kahā:] “Haaṅ, agar tum logoṅ kī ġaltiyoṅ ko maaf kar doge, to Allaah rabbul azeem bhī tumheṅ maaf kar degā.⁽¹⁴⁾ Lekin agar tum dusroṅ ko maaf naheeṅ karoge, to parwardigaar bhī tumko kabhī maaf naheeṅ karegā.⁽¹⁵⁾

“Jab tum rozā rakho to apne āp ko munaafikoṅ kī tarah kamzor mat zaahir karo. Wo log apne chehre ko aise banā lete haiṅ ki log unko dekh kar samajh jaaeṅ ki unkā rozā hai. Haqeeqat ye hai ki un logoṅ ko iskā koī sawaab naheeṅ milegā.⁽¹⁶⁾ Jab tum rozā rakho to apne chehre ko dho lo taaki tum accẖe dikho.⁽¹⁷⁾ Tab Allaah taa’alā ke alaawā kisī ko patā naheeṅ chalegā ki tum roze se ho. Allaah rabbul ālameen tumhaare saath akele me bhī hai. Wo us amal kā sawaab atā karegā jo binā kisī ko bataae chupke se kiyā gayā ho.”⁽¹⁸⁾