Bismillaah-Hir-Rahamaanir-Raheem

Ibraaheem^(a.s) Se Yaaqub^(a.s) Tak

Taurait : Ḳḥilqat 23:1-2, 25:7-10, 35:28-29

23:1-2

Saarah ek sau sattaaees saal ziṅdā raheeṅ aur⁽¹⁾ unkā iṅtiqaal mulk Kannaan ke ek shahar Kiriath Ārbā me huā. Ibraaheem^(a.s) unke guzar jaane par bahut ġamazdā hue aur roe.⁽²⁾

25:7-10

Ibraaheem^(a.s) ek sau pachahattar saal jie aur⁽⁷⁾ āḳḥir me buḍhe hue aur is duniyā se ruḳḥsat ho gae. Unhone ek lambī aur behatreen ziṅdagī guzaarī.⁽⁸⁾ Unko apne ḳḥaandaan waaloṅ ke saath dafnā diyā gayā. Unke donoṅ beṯoṅ, Ishaaq^(a.s) aur Ismaaeel^(a.s), ne mil kar unko Makfeeliyā kī ek gufā me dafnaayā jo Maamre shahar ke paas thī. Ye gufā Hittī Zohar ke beṯe Ifraan ke khet me thī.⁽⁹⁾ Ibraaheem^(a.s) ne is zameen ko Hittī logoṅ se ḳḥareedā thā taaki wo apnī beewī Saarah ko is gufā me dafan kar sakeṅ. Unko bhī apnī beewī ke paas dafnā diyā gayā.⁽¹⁰⁾

25:13-26

Ye Ismaaeel^(a.s) ke ḳḥaandaan kī daastaan hai. Ismaaeel^(a.s), Ibraaheem^(a.s) aur Haajirā ke beṯe the. Ismaaeel^(a.s) ke beṯoṅ me se pahale kā naam Naabaayaut thā aur phir Kidaar paidā huā, phir Adbeel, Misbaam,⁽¹³⁾ Mismaah, Domaah, Meesaah,⁽¹⁴⁾ Hadaad, Timaah, Yaatur, Nafees, aur Kidemaah.⁽¹⁵⁾ Ye sab Ismaaeel^(a.s) ke beṯoṅ ke naam haiṅ. Har beṯe kā ek alag ṯhikaanā thā aur baad me wo ṯhikaane cẖoṯe shahar ban gae. Ye baarah beṯe apne-apne ḳḥaandaanoṅ ke sarparast the.⁽¹⁶⁾ Ismaaeel^(a.s) ek sau saiṅtees saal ziṅdā rahe aur iṅtiqaal ke baad unko apne buzurgoṅ ke saath dafnā diyā gayā.⁽¹⁷⁾ Ismaaeel^(a.s) kī nasleṅ registaan me mulk Haweelah se Shur tak har jagah bas gaeeṅ. Ye jagah Misr se shuru ho kar Asur tak thī. Ismaaeel^(a.s) ke log apne dusre ḳḥaandaanoṅ se alag rahe jo Ibraaheem^(a.s) kī nasl se the.⁽¹⁸⁾

Ye Ibraaheem^(a.s) ke dusre beṯe Ishaaq^(a.s) ke ḳḥaandaan kī daastaan hai.⁽¹⁹⁾ Jab Ishaaq^(a.s) chaalees saal ke hue to unkī shaadī Rebekā se huī jo Faddaam Āraam kī rahne waalī theeṅ. Wo Baitiul kī beṯī aur Araamī Laban kī bahan theeṅ.⁽²⁰⁾ Ishaaq^(a.s) kī beewī se koī bhī bacchā naheeṅ thā to unhone Allaah taa’alā se duā maaṅgī. Allaah taa’alā ne unkī duā ko qubul kiyā aur Rebekā haamilā ho gaeeṅ.⁽²¹⁾ Jab wo haamilā theeṅ to unke peṯ me bacche ek dusre ko dhakkā dete the. Unhone Allaah taa’alā se duā maaṅgī aur pucẖā, “Mere saath aisā kyuṅ ho rahā hai?”⁽²²⁾ Allaah taa’alā ne unse kahā, “Tumhaare peṯ me do ḳḥaandaanoṅ ke sardaar haiṅ. Tumse do ḳḥaandaan paidā hoṅge aur unmeṅ baṅṯawaarā ho jaaegā. Unmeṅ se ek bahut mazbut hogā, aur baḍā ḳḥaandaan cẖoṯe kī ḳḥidmat karegā.”⁽²³⁾

Jab sahī waqt āyā to Rebekā ne do bacchoṅ ko paidā kiyā.⁽²⁴⁾ Pahale bacche kā raṅg laal thā aur uske jism par bahut baal the. Us bacche kā naam Īsaah rakhā.⁽²⁵⁾ Jab dusrā bacchā paidā huā to wo pahale bacche Īsaah ke pair kī eḍī zor se pakḍe hue thā. Islie us bacche kā naam Yaaqub^(a.s) rakhā. Jab janaab Īsaah aur Yaaqub^(a.s) paidā hue to Ishaaq^(a.s) kī umr saaṯh saal thī.⁽²⁶⁾

35:28-29

Ishaaq^(a.s) ek sau assī saal ziṅdā rahe aur⁽²⁸⁾ āḳḥir me buḍhe hue aur iṅtiqaal farmaayā. Unhone ek lambī aur behatreen zindagī guzaarī. Janaab Īsaah aur janaab Yaaqub ne mil kar Ishaaq^(a.s) ko ḳḥaandaanī qabristaan me dafan kiyā.⁽²⁹⁾