Bismillaah-Hir-Rahamaanir-Raheem

Sulemaan^(a.s) Ne Aqlmaṅdī Ko Chunā

Taurait : 1 Salaateen 2:1-4; 3:1b-28

Jab Daaud^(a.s) kā āḳḥirī waqt qareeb āyā to unhone apne beṯe Sulemaan^(a.s) se waseeyat karī.⁽¹⁾ Daaud^(a.s) ne kahā, “Mere marne kā waqt qareeb hai. Tum ek accẖe rahanumā bano aur⁽²⁾ Allaah taa’alā ke har hukm ko maano. Uske bataae hue raaste par chalo aur uske qaanun par amal karnā. Tum wahī karnā jo wo tumse chaahtā hai. Tum Musā^(a.s) kī kitaab par amal karnā. Agar tum ye sab karoge to tumko har kaam me kaamyaabī milegī, chaahe tum jahaaṅ bhī raho.⁽³⁾ Agar tum in bataaī huī baatoṅ par amal karoge to Allaah taa’alā mujhse kie waade ko zarur nibhaaegā. Usne waadā kiyā hai: ‘Tum unse kaho ki mere bataae hue tareeqe se ziṅdagī guzaareṅ aur unko mere upar pakkā īmaan honā chaahie. Agar wo aisā kareṅge to hameshā unke hī gharaane se ek ādmī Ibraaniyoṅ kā baadshaah banegā.’”⁽⁴⁾

3:1b-28

Sulemaan^(a.s) us waqt apne liye ek mahal aur baitul-muqaddas banwā rahe the. Wo Yerushalam ke chaaroṅ taraf ek uṅchī deewaar bhī banwā rahe the.^(1b) Baitul-muqaddas ke banne kā kaam abhī purā naheeṅ huā thā islie log jaanwaroṅ kī qurbaanī dene ke liye dusrī jagahoṅ par chabutrā banaate the.⁽²⁾ Baadshaah Sulemaan^(a.s) ne bhī Allaah taa’alā kī mohabbat haasil karne ke liye apne waalid kī kahī baatoṅ par amal kiyā. Wo bhī uṅchī jagah par jā kar qurbaanī pesh karte the aur ḳḥushbu jalaate the.⁽³⁾

Baadshaah Sulemaan^(a.s) qurbaanī dene ke liye Gibon gae. Wo wahaaṅ islie gae kyuṅki wo ibaadat karne kī sabse ḳḥaas jagah thī. Unhone wahaaṅ chabutre par ek hazaar jaanwaroṅ ko zibaah kiyā aur unke bhune gosht kī qurbaanī pesh karī.⁽⁴⁾ Jab wo Gibon me the to Allaah taa’alā ne unheṅ ek ḳḥwaab me bashaarat dī. Allaah taa’alā ne unse kahā, “Maaṅgo jo maaṅgnā chaahte ho maiṅ tumko atā karuṅgā.”⁽⁵⁾ Sulemaan^(a.s) ne jawaab diyā, “Tune mere waalid Daaud^(a.s) par bahut meharbaanī karī hai. Wo tere har hukm par amal karte the. Wo bahut īmaandaar the aur unhone apnī ziṅdagī hameshā nek kaamoṅ me guzaarī. Tune unke baad mujhe baadshaah chun kar mere waalid ko bahut izzat baḳḥshī hai.⁽⁶⁾ Yā Allaah rabbul azeem, tune mujhe mere waalid ke baad baadshaahī dī lekin, maiṅ abhī cẖoṯe bacche kī tarah huṅ. Mujhe itnī samajh naheeṅ hai ki maiṅ sahī ġalat kā faislā kar paauṅ.⁽⁷⁾

“Maiṅ terā ġulaam huṅ aur tere chune hue logoṅ me se ek huṅ. Ye qaum itnī baḍī hai ki iske logoṅ ko ginā bhī naheeṅ jā saktā.⁽⁸⁾ Islie tu mujhe aqlmaṅdī atā kar tabhī maiṅ sahī tareeqe se in logoṅ par hukumat kar paauṅgā aur sahī ġalat kā faislā karne kī samajh mujhe āegī. Binā aqlmaṅdī ke, ye mumkin naheeṅ ki maiṅ itnī azeem qaum par hukumat kar paauṅ.”⁽⁹⁾

Allaah taa’alā ko bahut ḳḥushī huī ki Sulemaan^(a.s) ne aqlmaṅdī maaṅgī.⁽¹⁰⁾ Allaah taa’alā ne unse kahā, “Tumne lambī umr kī ḳḥwaahish naheeṅ kī, nā hī tumne shoharat maaṅgī aur nā hī apne dushmanoṅ kī tabaahī. Kyuṅki tumne sahī faislā lene ke liye aqlmaṅdī maaṅgī hai to⁽¹¹⁾ maiṅ tumko wo atā karuṅgā jo tumne maaṅgā hai. Maiṅ tumko aql aur samajh atā karuṅgā. Tum itne zyaadā aqlmaṅd hoge ki jitnā abhī tak nā koī huā hai aur nā hī āne waale daur me paidā hogā.⁽¹²⁾

“Aur maiṅ tumko wo bhī atā karuṅgā jo tumne naheeṅ maaṅgā hai. Tumko izzat aur shoharat milegī. Tumhaarī ziṅdagī me koī bhī baadshaah tumse zyaadā azeem naheeṅ hogā.⁽¹³⁾ Agar tum mere baataae hue hukm aur qaanun se apnī ziṅdagī guzaaroge jis tarah tumhaare waalid ne guzaarī hai to maiṅ tumko ek lambī umr atā karuṅgā.”⁽¹⁴⁾

Sulemaan^(a.s) kī ḳḥwaab se jab āṅkh khulī to wo samajh gae ki Allaah taa’alā ne unse ḳḥwaab me baat karī hai. Tab wo Yerushalam me Ahad Ke Saṅduq ke paas jā kar khaḍe ho gae. Sulemaan^(a.s) ne wahaaṅ par Allaah taa’alā ko bhune gosht kī qurbaanī pesh karī aur baad me saare rahanumaaoṅ aur afasaroṅ ko daawat dī.⁽¹⁵⁾

Ek din do tawaayaf Sulemaan^(a.s) ke darbaar me āeeṅ.⁽¹⁶⁾ Unmeṅ se ek aurat ne kahā, “Mere maalik, ham donoṅ ek hī ghar me rahte haiṅ. Ye aurat mere paas maujud thī jab mere ek bacchā paidā huā thā.⁽¹⁷⁾ Teen dinoṅ ke baad iske bhī ek beṯā huā. Us waqt ghar me ham donoṅ ke alaawā koī bhī naheeṅ thā.⁽¹⁸⁾ Ek raat is aurat ne apne bacche kī taraf karwaṯ badlī aur us par chaḍh gaī jis wajah se iskā bacchā dab kar mar gayā.⁽¹⁹⁾ To us raat jab maiṅ so rahī thī to isne mere beṯe ko mere bistar se uṯhā liyā.⁽²⁰⁾ Subah jab maiṅ apne bacche ko dudh pilaane ke liye uṯhī to maine use marā dekhā! Jab maine usko ġaur se dekhā to wo merā beṯā naheeṅ thā.”⁽²¹⁾

Dusrī aurat ne kahā, “Naheeṅ! Ziṅdā bacchā merā beṯā hai aur marā huā tumhaarā hai!” Lekin pahalī aurat ne kahā, “Naheeṅ! Ziṅdā bacchā merā hai aur marā huā tumhaarā!” Aur is tarah donoṅ aurateṅ unke saamne bahas karne lageeṅ.⁽²²⁾

Sulemaan^(a.s) ne kahā, “Tum donoṅ hī ziṅdā bacche ko apnā kah rahī ho aur mare hue bacche ko dusre kā batā rahī ho.”⁽²³⁾ Tab Sulemaan^(a.s) ne apne naukar se talwaar laane ko kahā. Jab wo talwaar le kar āyā,⁽²⁴⁾ to unhone kahā, “Ziṅdā bacche ko do hissoṅ me kaaṯ do aur donoṅ auratoṅ ko ādhā-ādhā de do.”⁽²⁵⁾ Bacche kī aslī maaṅ ke dil me apne bacche ke liye aslī pyaar thā. Usne kahā, “Raham mere maalik, use mat maarie! Ye bacchā usī aurat ko de deejiye!” Lekin dusrī aurat ne kahā, “Is bacche ko do hissoṅ me kaaṯ deejiye taaki ye ham donoṅ me se kisī ko bhī nā mile!”⁽²⁶⁾

Sulemaan^(a.s) ne kahā, “Bacche ko maaro naheeṅ aur ise pahalī aurat ko de do kyuṅki wahī is bacche kī aslī maaṅ hai.”⁽²⁷⁾ Jab Ibraaniyoṅ ne Sulemaan^(a.s) ke faisle ko sunā to wo unkī bahut izzat karne lage. Unhone dekhā ki Sulemaan^(a.s) ko Allaah taa’alā ne aqlmaṅdī baḳḥshī hai taaki wo sahī faisle kar sakeṅ.⁽²⁸⁾