Bismillaah-Hir-Rahamaanir-Raheem

Allaah Taa’alā Kī Panaah

Zabur 91

Jo log Allaah rabbul azeem kī hifaazat me rahte haiṅ,

to wo log uskī saltanat me sukun se haiṅ.⁽¹⁾

Maiṅ Allaah se kahuṅgā, “Tu merī salaamtī aur panaah kī jagah hai.

Tu hī merā rab hai, aur maiṅ tujh par hī bharosā kartā huṅ.’’⁽²⁾

Allaah rabbul kareem tumheṅ cẖupī huī chaaloṅ se aur

jaanlewā beemaariyoṅ se mahafuz rakhegā.⁽³⁾

Wo tumhaarī hifaazat ek chiḍiyā kī tarah karegā jo apne par

phailaakar apne bacchoṅ kī hifaazat kartī haiṅ.

Uskā kalaam tumhaarī ḏhaal ke jaisā hai.⁽⁴⁾

Tum raatoṅ ke ḳḥatroṅ se aur

din me teer ke hamloṅ se naheeṅ ḏaroge.⁽⁵⁾

Tum us bimaariyoṅ se naheeṅ ḏaroge jo aṅdhere me ātī haiṅ.

Yā us marz se jo din me hamlā kartā hai.⁽⁶⁾

Tumhaarī taraf se ek hazaar log mar jaayeṅ,

yā das hazaar log tumhaare baraabar me hī kyuṅ nā mareṅ

lekin tumheṅ koī nuksaan naheeṅ pahuṅchegā.⁽⁷⁾

Tum sirf dekhoge kī kyā ho rahā hai.

Tum gunahgaaroṅ ko sazā milte dekhoge.⁽⁸⁾

Allaah hī tumhaarī hifaazat karne waalā hai.

Tum Allaah rabbul azeem ko apnī salaamtī kī jagah banā chuke ho.⁽⁹⁾

Nā koī burī cheez tumhaare upar āegī.

Aur n koī museebat tumhare ghar kī taraf jaaegī.⁽¹⁰⁾

Wo apne farishte tumhaarī hifaazat ke liye bhejtā hai.

Tum jahaaṅ bhī jaate ho, wo tumhaarī dekhbhaal karte haiṅ.⁽¹¹⁾

Isse pahale tumhaare pair patthar se ṯakraaeṅ.

Wo tumko apne haathoṅ se saṁbhaal leṅge.⁽¹²⁾

Tum taaqatwar sheroṅ aur zahareele saaṁpoṅ ko apne pairoṅ se kuchloge.

Tum in sheroṅ aur zahareele saaṁpoṅ par chaloge.⁽¹³⁾

Allahā taa’alā kā irshaad hai, “Agar koī mujhse pyaar kartā hai, to maiṅ use bachā luṅgā.

Jo mujhe jaante haiṅ unheṅ mahafuz rakhuṅgā.⁽¹⁴⁾

“Wo mujhe pukaareṅgeṅ, aur maiṅ unheṅ jawaab duṅgā maiṅ museebat me unke saath rahuṅgā.

Maiṅ unheṅ bachaauṅgā aur izzat baḳḥshuṅgā.⁽¹⁵⁾

“Maiṅ unheṅ lambī umr atā karuṅgā.

Maiṅ unheṅ nijaat kā raastā dikhaauṅgā.”⁽¹⁶⁾