Bismillaah-Hir-Rahamaanir-Raheem

Shaitaan Kī Chaalbaazī

Taurait : Ḳḥilqat 3:1-13

Allaah taa’alā ke banaae hue jaanwaroṅ me se, saaṁp sabse zyaadā dhokhebaaz thā. Saaṁp ne aurat se baat karī aur pucẖā, “Aurat, kyā tumko sach me Allaah taa’alā ne baaġ ke kisī bhī peḍ kā phal khaane se manā kiyā hai?”⁽¹⁾ Aurat ne saaṁp ko jawaab diyā, “Naheeṅ, ham baaġ ke saare peḍoṅ se phal khā sakte haiṅ,⁽²⁾ lekin baaġ me ek peḍ hai jiskā phal hameṅ khaane ke liye manā kiyā hai aur kahā hai ki hameṅ us peḍ ko cẖunā bhī naheeṅ hai, warnā ham sach me mar jaaeṅge.”⁽³⁾ Saaṁp ne aurat se kahā, “Tum yaqeenan naheeṅ maroge.⁽⁴⁾ Allaah taa’alā jaantā hai ki agar tum us peḍ kā phal khā loge to us din tumhaarī āṅkheṅ khul jaaeṅgī aur tum Allaah taa’alā kī tarah ho jaaoge, jo accẖe, bure, barkat, aur azaab kā farq jaantā hai.”⁽⁵⁾

Aurat ne dekhā ki wo peḍ bahut ḳḥubsurat thā, aur uskā phal bhī dikhne me accẖā lag rahā thā. Usko yaqeen ho gayā ki peḍ kā phal usko aqlmaṅd banā degā, to usne peḍ se phal toḍ kar khaayā aur apne shauhar ko bhī diyā, jo is ke saath thā. Usne bhī khā liyā.⁽⁶⁾ Tab donoṅ kī āṅkheṅ khul gayeeṅ aur unkā cheezoṅ ko dekhne kā nazriyā badal gayā. Unhone dekhā ki unke jism par kapḍe naheeṅ haiṅ. To unhone aṅjeer ke pattoṅ ko sī kar kapḍoṅ kī tarah pahan liyā.⁽⁷⁾

Shaam ke waqt unheṅ Allaah taa’alā kī maujudgī kā ehasaas huā to wo baaġ ke peḍoṅ ke peecẖe cẖup gae.⁽⁸⁾ Allaah taa’alā ne Ādam^(a.s) ko pukaarā aur kahā, “Tum kahaaṅ ho?”⁽⁹⁾ Ādam^(a.s) ne jawaab diyā, “Maiṅ āpkī maujudgī ke ehasaas se ḏar gayā huṅ kyuṅki maiṅ binā kapḍoṅ ke huṅ, islie ḳḥud ko peḍoṅ me cẖupā liyā hai.”⁽¹⁰⁾ Allaah taa’alā ne pucẖā, “Tumko kisne bataayā ki tum kapḍe naheeṅ pahne ho? Kyā tumne us peḍ kā phal khaayā hai jisko maine tumhaare liye haraam kiyā thā?” Tab⁽¹¹⁾ Ādam^(a.s) ne kahā, “Jis aurat ko āp ne mere saath rakhā hai, usī ne mujhe us peḍ kā phal diyā thā islie maine khā liyā.”⁽¹²⁾ Phir Allaah taa’alā ne aurat se pucẖā, “Ye tune kyā kiyā?” Tab aurat ne kahā, “Maine saaṁp kī baatoṅ me ā kar phal khā liyā.”⁽¹³⁾