Bismillaah-Hir-Rahamaanir-Raheem

Haabeel Aur Qaabeel

Taurait : Ḳḥilqat 4:1-16

Ādam^(a.s) aur beebī Hawwā ke āpsī silsile se wo haamilā hueeṅ aur ek laḍke ko paidā kiyā. Beebī Hawwā ne kahā, “Maine Allaahtaa’alā kī qudrat se ek bacche ko paidā kiyā hai.” Unhone us laḍke kā naam Qaabeel rakhā.⁽¹⁾ Beebī Hawwā ne phir Qaabeel ke bhaaī Haabeel ko paidā kiyā. Haabeel ne jaanwar charaane kā kaam chunā aur Qaabeel ne khetī karne kā.⁽²⁾ Fasal kī kaṯaaī ke waqt Qaabeel ne Allaah taa’alā ko anaaj kā nazraanā pesh karā.⁽³⁾ Haabeel ne Allaah taa’alā ko nazraanā dene ke liye apnī bheḍoṅ ke jhuṅḏ se ek bheḍ ko qurbaan kiyā. Unhone bheḍ ke pahale bacche kī qurbaanī dī aur uske jism kā sabse accẖā gosht pesh kiyā.

Allaah taa’alā ne Haabeel aur uskī qurbaanī ko qubul kiyā.⁽⁴⁾ Lekin, Allaah rabbul azeem ne nā hī Qaabeel kī qurbaanī ko qubul kiyā aur nā hī use.^[a] Qaabeel ko is wajah se bahut takleef huī aur wo bahut naaraaz huā.⁽⁵⁾ Allaah taa’alā ne Qaabeel se pucẖā, “Tum naaraaz kyuṅ ho? Tumhaare chehre par udaasī kyuṅ hai?⁽⁶⁾ Tum jaante ho ki agar tum wo karoge jo sahī hai to maiṅ tumko bhī qubul kar luṅgā, lekin agar tum wo karoge jo sahī naheeṅ hai, to gunaah tumhaare darwaaze par tumhaarā iṅtazaar kar rahā hai. Gunaah tum par qabzā karnā chaahtā hai, lekin tumheṅ us par haawī honā chaahie.”⁽⁷⁾

Qaabeel ne apne bhaaī Haabeel se kahā, “Chalo khet me chalte haiṅ.” Wahaaṅ jā kar Qaabeel ne apne bhaaī Haabeel par hamlā kiyā aur usko qatl kar diyā.⁽⁸⁾ Baad me jab Allaah taa’alā ne Qaabeel se pucẖā, “Tumhaarā bhaaī Haabeel kahaaṅ hai?” Qaabeel ne jawaab diyā, “Maiṅ naheeṅ jaantā. Kyā Haabeel kā ḳḥyaal rakhnā merī zimmedaarī hai?”⁽⁹⁾ Tab Allaah taa’alā ne Qaabeel se kahā, “Ye tumne kyā kiyā? Suno, tumhaarī wajah se zameen par ḳḥun girā hai aur wo mujhse cheeḳḥ-cheeḳḥ kar fariyaad kar rahā hai.⁽¹⁰⁾

“Tum par laanat hai aur tumko is jagah se bhagā diyā jaaegā.⁽¹¹⁾ Ab tum zameen par kucẖ bhī ugaaoge to wo use paidā naheeṅ karegī. Ab is zameen par tumhaare rahne ke liye koī ṯhikaanā naheeṅ aur tum ek jagah se dusrī jagah bhaṯakte phiroge.”⁽¹²⁾

Tab Qaabeel ne Allaah taa’alā se kahā, “Ye sab mere bardaasht se baahar hai.⁽¹³⁾ Tu mujhe apnī rahamat se dur kar rahā hai, to ab maiṅ nā hī tere qareeb ā paauṅgā aur nā hī merā koī ghar hogā. Mujhe ek jagah se dusrī jagah bhaṯaknā paḍegā aur maiṅ jisse bhī miluṅgā wo mujhe qatl kar degā.”⁽¹⁴⁾ Tab Allaah taa’alā ne Qaabeel se kahā, “Agar koī tujhe maaregā to us insaan ko saat gunā zyaadā sazā milegī.” Tab Allaah taa’alā ne Qaabeel ko ek ḳḥaas nishaan diyā taaki koī use nā maare.⁽¹⁵⁾ Qaabeel Allaah taa’alā kī rahamat se dur mulk Naad kī zameen par bas gayā.⁽¹⁶⁾

[a] Quraan Majeed : Al-Maaidā 5:27: “Nā hī Qaabeel kī qurbaanī ko qubul kiyā aur nā hī use.”