Bismillaah-Hir-Rahamaanir-Raheem

Hikmat Kī Kahaawateṅ

Zabur : Kahaawateṅ 3:5-8; 1:7; 29:25; 12:15; 15:32; 18:10; 21:3; 4:23

3:5-8

Allaah taa’alā par pure dil se yaqeen karo. Kabhī bhī us cheez par bharosā mat karo jise tum sochte ho ki maiṅ ise jaantā huṅ.⁽⁵⁾ Apne har kaam me apne parwardigaar ko yaad rakho kyuṅki wo hī tumko seedhā raastā dikhaaegā.⁽⁶⁾ Kabhī bhī apne āpko itnā aqlmaṅd mat samjho ki jitnā tum naheeṅ ho; balki tum Allaah taa’alā kā kahnā maano aur gunaahoṅ se bacho.⁽⁷⁾ Agar tum ye karoge to wo tumhaare liye ek accẖī dawā ke jaise hogī, jo tumhaare zaḳḥmoṅ ko bhar degī aur dard ko kam karegī.⁽⁸⁾

1:7

Ilm haasil karne ke liye tumko sabse pahale dil se Allaah taa’alā kī izzat karnī paḍegī. Bewaquf log aqlmaṅdī ko ahamiyat naheeṅ dete aur ilm haasil karne se parahez karte haiṅ.⁽⁷⁾

29:25

Jo iṅsaan se ḏaregā wo [Shaitaan ke] jaal me phaṅs jaaegā. Lekin Allaah rabbul azeem kī izzat karne waalā hameshā hifaazat se rahegā.⁽²⁵⁾

12:15

Bewaquf ko apne kaam kā tareeqā bilkul sahī lagtā hai, lekin ek aqlmaṅd iṅsaan hameshā dusroṅ se mashwarā letā hai.⁽¹⁵⁾

15:32

Agar tum seekhne se inkaar kar doge to tum apnā ḳḥud nuqsaan karoge, lekin agar tum dusroṅ kā mashwarā qubul karoge to aqlmaṅd kahalaaoge.⁽³²⁾

18:10

Allaah taa’alā kī panaah ek mazbut qile kī tarah hai jahaaṅ nek log hifaazat se haiṅ.⁽¹⁰⁾

21:3

Allaah taa’alā ko nek kaam aur īmaandaarī qurbaanī se zyaadā pasaṅd hai.⁽³⁾

4:23

Apnī soch par qaabu rakho; kyuṅki tumhaarī zindagī tumhaarī soch se nikhartī hai.⁽²³⁾